تعرف على الفنانين الداعمين لـ ” محمد سامي”

شروق ممدوح

بعد قضية وقف المخرج محمد سامي، من قبل الشركة المتحدة وعدم التعامل معه مرة أخرى، انقسم الفنانين والفنانات إلى صراعات بين مؤيد ومعارض محمد سامي.

ومن خلال هذه الحملة ذهب البعض من الفنانين لدعم المخرج محمد سامي وجاء دعمهم كالآتي:

نشر الفنان أحمد زاهر عبر حسابه الشخصي بموقع التواصل الاجتماعى “فيسبوك” صورة تجمعه بالمخرج محمد سامي معلقاً عليها قائلاً: “انا مش ضد قرار المتحده لان اكيد ده له اسباب و في سبيلها للحل باذن الله انا ضد حمله التشويه البشعه لسمعه و شخص محمد سامي اللي بيقوم بيها بعض الزملاء و بعض اللجان الاليكترونية انا ضد تشويه سمعه اي حد مش بس محمد سامي الراجل ده انا اعرفه من ١١ سنه و اشتغلت معاه اكتر من خمس اعمال مشوفتش منه غير كل خير و احترام و تقدير للموهبه و بقولها و هاقولها طول عمري محمد سامي هو اللي غير حياتي بعد اراده ربنا سبحانه و تعالي ولن انسي له هذا الفضل هو اللي خلاني اخس ١٠٠ كيلو عشان تمسك بيا في مسلسل حكايه حياه و ده الدور اللي غير حياتي و تتوالي بعده كم نجاحات و كلها معاه و اخرها #فتحي في #البرنس و دي كانت نقطه تحول تانيه في حياتي …. تفتكروا اللي شفت منه كل الخير و الاحترام و التقدير و الموهبه و النجاح ده كله مكنش جنبه و ادعمه انا مفيش في ايدي حاجه اعملها غير اني اقول شهاده حق يعلمها الله سبحانه و تعالي وعاوز بس افكركوا ان محمد سامي هو نفس المخرج اللي سقفتوا له كل السنين اللي فاتت #ادعم_المخرج_محمد_سامي”.

نشر الفنان إدوارد عبر حسابه الشخصي بموقع التواصل الاجتماعي “فيسبوك” صورة تجمعه بالمخرج محمد سامي، معلقاً عليها قائلاً: “ادعم المخرج #محمد_سامي ضد حملة التشويه اللي يقوم بها بعض الزملاء وعلشان كده بقول شهاده حق في المخرج #محمد_سامي انا اشتغلت معاه واتعاملت في الشغل معاه راجل بحب شغله جدا وبيتعب كتير واتعامل معايا بكل احترام وحب وبيحب الممثل جدا وبيطلع احسن ما عنده وعشان محدش يقول عشان انا بشتغل معاه الناس كلها عارفه اني بشتغل معاه ومع غيره ومش مستني شغل من حد الحمدالله انا تاريخي في السينما والدراما كبير وبشتغل مع ناس كتير دي شهادة حق بس ولازم اقولها هاشتاج  ادعم_المخرج_محمد_سامي”.

نشرت الفنانة نور عبر حسابها الشخصي بمواقع تبادل الصور والفيديوهات “الانستجرام”، صورة تجمعها بالمخرج محمد سامي، معلقة عليها قائلة: “محمد سامي مخرج موهوب وشاطر وفنان متميز اشتغلت معاه اكتر من مره وما شفتش منه غير كل احترام وأخوه وتقديره وغيره على الشغل، وقبل كل ده ابن ناس طيبين ومحترمين محمد سامي مخرج كبير وأعماله بتشهد على كده وبتتكلم عنه، العمل الفني ملك للجمهور والفن وجهان النظر وكل واحد بشوف العمل الفني زي ماهو عايز، ما ينفعش نشمت في بعض ونجرح في بعض، خصوصا أن احنا زملاء وعارفين مدي التعب والكفاح اللي كل واحد مننا بيقدمه فمكانه”.

نشر الفنان محمد مهران عبر حسابه الشخصي بمواقع التواصل وتبادل الصور والفيديوهات “الانستجرام” صورة تجمعه بالمخرج محمد سامي، معلقاً عليها قائلاً: ” الراجل ده مكناش صحاب شافني مره في المسرح في 2015 وقالي أننا هنشتغل مع بعض ومشفتوش بعدها غير سنه 2020 لما اشتغلت معاه في مسلسل البرنس ومن بعدها بقينا بتشتغل مع بعض مشوفتش منه حاجه وحشة خالص ومالوش معايا اي مصلحه شخصية كان داعم ليا ولموهبتي بشكل كبير واي ممثل بيكون هدفه أنه يشتغل مع مخرج شاطر ومأمن بيه ومظنض لما هتشوف C.V المخرج ده مش هقدر تقول غير أنه مخرج مهم وشاطر وبيطلع من الممثل افضل ما عنده، ملاحظة لبعض الناس اللي بتتكلم عن الشلليه انا عمري في حياتي ماقابلت استاذ محمد سامي بره نطاق العمل.. مقعدتش معاه في كافيه ماسهرتش معاه بتجمعني بيع علاقه ود واحترام وعمل وبس هاشتاج ادعم_المخرج_محمد_سامي”.

نشر الفنان ماجد المصري عبر حسابه الشخصي بمواقع تبادل الصور والفيديوهات “الانستجرام”، صورة تجمعه بالمخرج محمد سامي معلقاً عليها قائلاً: “من ايام مسلسل كلام على ورق مع المخرج الموهوب محمد سامي وحشني الشغل معاك يا عبقري”.

دعم الفنان عماد زيادة عبر حسابه الشخصي بموقع التواصل الاجتماعي “فيسبوك” المخرج محمد سامي، حيث كتب قائلاً: “ادعم المخرج المحترم الخلوق محمد سامي واشهد امام الله اني لم اري منه الا حسن الخلق والاحترام والرقي في التعامل مع كل الناس داخل العمل وهو راجل وشهم وخير جدا كمان وبيوقف بكل رجوله مع اي فنان معاه داخل اي عمل او لوكيشن حتي يظهره بافضل شكل ممكن ليه وانا ضد اي زميل يقول غير كدا لان محمد ماكانش يقدر ينجح كل النجاح الكبير دا في كل اعماله لو كان معندوش حس فني وانساني كبير ولو فتحا صفحه محمد سامي حانلاقيه بعد اي عمل فني بينزل بوستات يشكر فيها الناس اللي اشتغلت معاه ويدعمهم هي دي اخلاق محمد سامي الحقيقيه #ادعم_المخرج_محمد_سامي”.

بينما جاء البعض في حياد بين دعم قرار الشركة المتحدة وبين دعم موهبة المخرج محمد سامي.

نشرت الفنانة منة فضالي عبر حسابها الشخصي بموقع التواصل الاجتماعى “فيسبوك” بوست قائلة: “انا مش ضد قرار المتحده
اعرف محمد سامي من سنين وعمري ما اشتغلت معاه انا الشهاده لله لما اشتغلت مع استاذ محمد سامي السنه دي مشوفتش منه حاجه وحشه بلعكس كان محترم جدا معايا واستفدت من الشغل معاه مخرج شاطر جدا وله اعمال كتير ناجحه وانا مش بطبلو علشان محدش يقول بطبل علشان الشغل انا بقول حق ربنا”.

بينما نشرت الإعلامية لمياء فهمي عبر حسابها الشخصي بموقع التواصل الاجتماعي “فيسبوك” صورة للمخرج محمد سامي تجمعه بزوجته مي عمر معلقة عليها قائلة: “اتعودت ماكتبش حاجه غير لما تكون مهمه زي ماتعودت واتربيت أني ماجرحش في حد ولا اهينه لأني ماحبش أتهان ولا حد يجرحني.. بالنسبه للمخرج محمد سامي والفنانه مي عمر أنا ماعرفهمش شخصيًا لكن أتفرجت على كذا مسلسل لمحمد سامي وعجبني شغله جدًا زي ما عجب كل الناس وأنا قاصده أقول كل الناس لأن لما كان بيتعرضله مسلسل كان كل ما أشوف حد يكلمني عن مسلسله والجملة بصراحه اللي كنت بسمعها محمد سامي بينجح أي حد يخرجله أما بقى مي عمر شوفت لها فيلم تصبح على خير مع النجم تامر حسني وكانت عامله دور حلو ولطيف وبعدها مسلسل لؤلؤ اللي تقريبًا كل الناس في نفس الوقت اللي كانت بتشتم فيها كانت مابتسيبش حلقة واحدة.. اللي عاوزه أقوله هو احنا بننسى ليه الحلو بسرعه ونمسك في الوحش ونفضل نحاسب بعض ونجرح أنا بتكلم لأني زعلت جدًا لما لقيت ألفاظ كلها تجريح وإهانة وشماته فيهم لدرجة غريبة وملفتة وكأنهم خدوا رزقهم أحنا ممكن ننتقد من غير ما نهين ونشتم ونجرح
يا جماعه راعوا مشاعر بعض راعوا أن النقد بالشكل البشع ده يهد ويموت والله ما أعرفهم لكن زعلت عشانهم وقولت ليه الشماته والإهانة دي كلها وكأنه طار وفجأه طلعت كل سلبياتهم ومشاكلهم في البلاتوه.. طيب اشمعنى دلوقتي؟!
أنا مشوفتش المسلسل ولا بتكلم عنه لكن بتكلم عن مبدأ النقد والتجريح.. مين في اللي جرح يحب يتقاله الكلام ده؟!
عارفه أن في ناس هتدخل تهاجمني أو كمان تشتمني بس والله كلمتين وكان لازم أقولهم”.

 

-: شارك هذا المحتوي مع اصدقائك علي