You are currently viewing لقاء الخميسي لـ “أهل كايرو”: حتة من القمر شخصية مركبة تجذب كل فنان .. أحضر لعمل فني جديد يخص كل امرأة

لقاء الخميسي لـ “أهل كايرو”: حتة من القمر شخصية مركبة تجذب كل فنان .. أحضر لعمل فني جديد يخص كل امرأة

سارة محمد الباجوري

لقاء الخميسي فنانة متنوعة، لم تقتصر على لون واحد في أعمالها بل قدمت الكوميدي والتراجيدي والأعمال الرومانسية أيضًا، لم تحصر نفسها في لون واحد، جذبت أنظار الجماهير من خلال أعمالها فحصلت على محبتهم وأصبحوا ينتظروا إطلالتها عليهم في الشاشة من خلال أدوارها المتميزة.

وكان لأهل كايرو حوار ممتع مع الفنانة لقاء الخميسي:

ما الذي جذبك لحكاية”حتة من القمر”؟
حكاية”حتة من القمر” تجذب أي ممثلة تريد تمثيل دور صعب ومركب، الحدوتة حلوة وفيها تفاصيل كتير ومليئة بالرسائل الهامة، أهمها حب الذات والثقة بالنفس، “حبي نفسك مهما كنتي عشان العالم كله يحبك”، في اللحظة التي تفقدي فيها ثقتك في نفسك حياتك بتدمر، ولا للتنمر لأن التنمر زاد جدًا والتنمر بقي في كل الأمور وليس الشكل والوضع الإجتماعي فقط.

هل من وجهة نظرك الأعمال الأوف سيزون تحقق نجاح زي الأعمال في الموسم الرمضاني؟
أكيد الأوف سيزون له جمهوره ورمضان له جمهوره، وساعات كتير الجمهور مش بيتفرج على أعمال رمضان وبتتفرج على الأعمال في الأوف سيزون، والعكس كذلك، كل عمل لو قوي بينجح ليس له علاقة بالموسم إللي بيتعرض فيه، ولكن فيه أعمال في رمضان مش بتتشاف بسبب الزحمة في الموسم فالأفضل يكون الأوف سيزون عشان بيكون الأعمال مش كتيرة فالجمهور بيقدر يشوفها من غير ضغط.

هل توقعتي ردود الأفعال على حكاية”حتة من القمر”؟
ردود الأفعال الحمد لله فاقت توقعاتنا كلنا، كنا متوقعين أن الحكاية تلمس الجمهور عشان هي لمستنا وأحنا شغالين، والكرو كله كانت القضية لمساه جدًا.

هل كان عندك تخوف قبل قبول الحكاية خاصة أنها بتناقش قضية جديدة مش مسلط الضوء عليها من قبل الدراما المصرية؟
مكنش فيه أي تخوف لأن إللي بيقدم فن أو بيقدم قضية مهمة مش بيخاف، الخوف بيخسر كتير، والواحد لما بيكون مؤمن بالقضية إللي بيقدمها الخوف مش بيكون جزء من الحدوتة.

أيه أصعب مشاهدك في حكاية”حتة من القمر”؟
كل المشاهد صعبة لأن كل المشاهد عميقة، حتي المشاهد إللي بتبتسم وبتبين أنها قوية فيها، كل المشاهد فيها صراعات نفسية.

هل قابلتي شخصيات في الحقيقة زي قمر، وهل حد كلمك بعد عرض الحكاية وقالك عن تجربته مع مضايقات الناس؟
لا مقابلتش الشخصية إللي ربنا أداله هدية الوحمة، أتعرفنا على ده على الأنترنت أنا والمؤلفة ميرنا الفقي، وشوفنا صور وأتعاملنا مع دكتور متخصص وبعتلنا حالات كتير وذاكرناها، أنا قابلت وحمات زي الأستاذ الراحل حسن الأسمر بس فيه حالات فاقت توقعاتنا لأن أحجامها أكبر مما هو متخيل، لكن بعد عرض الحكاية كانت ردود الأفعال عظيمة وناس كتير بعتولي صورهم وشكرونا.

كلمينا عن مشاركتك مع المخرج محمد عبد الرحمن حماقي؟
محمد عبد الرحمن غير أنه مخرج شاطر فهو إنسان جميل جدًا وأخ وصديق ليا، ومخرج أتعاملت معاه السيزون ده في مسلسلين مهمين وهما “أجازة مفتوحة”، “حتة من القمر”، وهو مخرج متميز وله المذاق الخاص به وإن شاء الله التوفيق والنجاح في كل إللي جاي وبتمناله كل الخير.

في النهاية هل هناك أعمال جديدة بتحضري ليها خلال الفترة المقبلة؟
مفيش أعمال جديدة، بس بنحضر لتجربة تانية أنا وميرنا الفقي صديقتي.